在家工作一周年
新冠肺炎好似已經係世界各地「爆發」咗好耐。不過喺荷蘭，舊年二月底先有第一個確診個案；到三月中先至有各大公司主動叫員工在家工作。
當其時有幾個同事傾偈，大家就估吓到底Work from Home會持續幾耐。幾個人入面我最「悲觀」，當眾人覺得兩三個星期之後大家又會返去辦公室，我就話「起碼三個月」。當然會有人覺得嘩眾取寵，但喺SARS環境下長大嘅香港人，當然會知道件事有幾咁嚴重。結果一年後嘅今日，當日傾偈嘅同事有人已經確診，而返辦公室嘅日子真係遙遙無期。
如果本身屋企有足夠設備，在家工作可以好舒服。隨時可以自己煮嘢食，又唔使下下打扮返公司，通勤嘅時間又慳返，其實都唔太差。不過，當日日都係做同一樣嘢，而且又冇乜機會出去其他地方，只能夠講一句：「好悶呀！ ！ ！」
在家工作最大嘅影響係，減少咗好多面對面嘅溝通。雖然現今電子溝通設備已經發展得非常好，即使係在家工作之前，有好多聯絡上嘅工作都係透過電話同電郵，但係辦公室入面可以隨時同隔離位傾兩句，或者大家一齊飲杯咖啡增進下感情，開會嘅時候又見到大家唔同人嘅身體語言。依家大多時候係隔全個屏幕，最多開個視像會議望下個樣，真係爭好遠。
另一方面，因為疫症嘅問題，完全出唔到差。對於習慣咗時常要出差嘅我來講，即使隔咗一年都覺得好「身痕」，想快啲攞個篋出差哈哈！
如果有得俾你揀，你會寧願日日返公司，定係終日留喺屋企工作呢？
Search